1 қазан – Халықаралық қарттар күні!

2020 жылдың 30 қыркүйек күні 1 қазан – Халықаралық қарттар күніне орай Тараз қаласының тұрғыны, ҰОС ардагері Ережепбай Муталип атамызға спорт клубы ұжымы атынан құрмет көрсетіліп, атамыздың батасын алды.
Ережепбай Муталип – 1926 жылы 23 наурызда Талас ауданының Қарой аулында дүниеге келген. 1944 жылы әскер қатарына шақырылып, Ұлы Жеңістен соң әйгілі Брест қамалын қалпына келтіруге қатысқан.
Елге 1950 жылы оралған. Осы жылдан бастап Талас аудандық Кеңес атқару комитетінде нұсқаушы, аудандық «Ленин жолы» (қазіргі «Талас тынысы») газетінде алғаш жауапты хатшы, кейінірек уақытша редактор міндетін атқарған. 1958-1962 жылдары Алматы жоғары партия мектебінде оқыған. Оны журналист мамандығын алып, бітірген соң әр жылдарда Талас аудандық партия комитетінде нұсқаушы, аудандық газет редакторының орынбасары, редактор, Талас асыл тұқымды мал зауытында партия комитетінің хатшысы, 1976 жылдан аудандық газет редакторының орынбасары, кейіннен редакторы болып істеп жүріп, зейнет демалысына шыққан. Он жылдан астам уақыт аудандық соғыс және еңбек ардагерлері кеңесінің төрағасы және төрағаның орынбасары болып сайланған.
II дәрежелі Отан соғысы орденімен және ондаған мерекелік медальдармен, грамоталармен марапатталған.Соғыс және еңбек ардагері, запастағы майор, Талас ауданының Құрметті азаматы.
«Атақоныс», «Өлеңім – өмірім» т.б. кітаптары жарық көрген.